Үлэмж том гэрийг Гиннесийн номд бүртгэгджээ
Өндөр нь 14 метр буюу гурван давхар байшинтай тэнцэнэ. Үүгээрээ бүх цаг үед бүтээгдсэн хамгийн том гэр болжээ
Монгол урчуудын бүтээсэн үлэмж том гэр дэлхийн дээд амжилтыг эвдэн Гиннесийн номд бүртгэгджээ.
Энэхүү гэрийг Ханги-Мандалын боомтын ойролцоо барьсан бөгөөд аялал жуулчлалын зориулалтаар ашиглах юм байна. Гэр нь 36 ханатай, 28.81 метр диаметртэй, 1000 шахам ам метр талбайтай, нэг дор 500 хүн хүлээн авах багтаамжтай. Өндөр нь 14 метр буюу гурван давхар байшинтай тэнцэнэ. Үүгээрээ бүх цаг үед бүтээгдсэн хамгийн том гэр болжээ. Аварга том гэрийн онцлогийн тухай “Сэлнэн” ХХК-ийн захирал уран сийлбэрч, үндэсний модон эдлэл урлаач мастер Д.Дамсрайсэлнэн “Гэр дөрөвхөн багананд тулгуурлаж боссоноороо онцлог. Том гэрүүдийн хувьд униныхаа даацыг авахын тулд том том багана хийдэг. Бид уламжлалт хийц загвараа алдагдуулахгүйг хичээсэн тул унийг нь нуман хэлбэртэй хийсэн” гэлээ.