Монгол Улсын Ерөнхийлөгч Х.Баттулгад Унгар Улсын Ерөнхий сайд Виктор Орбан бараалхав

Densmaa 2017-08-31 03:08

Улс төр

Уулзалтаар “Биокомбинат төрийн өмчит үйлдвэрийн газрын тоног төхөөрөмжийг шинэчлэх” төслийг Унгарын талтай хамтран хэрэгжүүлэх талаар эрчимтэй ажиллахаар тохиролцсон байна.

    Унгар Улсын Будапешт хотноо наймдугаар сарын 28-наас есдүгээр сарын 2-ны өдрүүдэд зохион байгуулагдаж байгаа Жүдо бөхийн дэлхийн аварга шалгаруулах тэмцээнд Монголын Жүдо бөхийн холбооны Ерөнхийлөгчийн хувиар оролцож байгаа юм.

    Монгол Улсын Ерөнхийлөгч Х.Баттулгыг хүндэтгэн Унгар Улсын Ерөнхий сайд Виктор Орбан бараалхажээ. Уулзалтын үеэр талууд хоёр орны харилцаа, хамтын ажиллагааны өнөөгийн байдлын талаар дэлгэрэнгүй санал солилцож, эдийн засгийн хамтын ажиллагааг эрчимжүүлэхээр тохиролцлоо. Тухайлбал, 2010 онд байгуулсан “Биокомбинат төрийн өмчит үйлдвэрийн газрын тоног төхөөрөмжийг шинэчлэх” төслийг санхүүжүүлэх 25 сая ам.долларын тусламжийн зээл олгох тухай хэлэлцээр өнөө хүртэл хэрэгжээгүй байгаа асуудлыг хэлэлцсэн байна. Энэ төслийн хэрэгжилт удаашрах болсон шалтгааныг тодруулж, төслийг яаралтай эхлүүлэх чиглэлээр хоёр тал ажиллахаар болжээ. Төслийг хамтран хэрэгжүүлэхийн төлөө Монгол Улсын Ерөнхийлөгч Х.Баттулга Үйлдвэр, хөдөө аж ахуйн сайдаар ажиллаж байхдаа анхаарал хандуулан ажиллаж байсан юм. Уг төсөл хэрэгжсэнээр хөдөө аж ахуйн гаралтай түүхий эдийн экспортод дорвитой ахиц гарч, Монголын эдийн засгийг олон салбартай болгон солонгоруулахад чухал ач холбогдолтой юм.