“Өргөтгөсөн санхүүжилтийн хөтөлбөр”-ийн эхний ээлжийн 38.6 сая ам.долларын санхүүжилт орж ирэв
Хөтөлбөрийн үр дүнд Монгол Улсад үнийн тогтвортой байдал хангагдах, валютын нөөц нэмэгдэж 4 тэрбум ам.доллар орчимд хүрэх юм
ОУВС-аас Монгол Улсад гурван жилийн хугацаанд “Өргөтгөсөн санхүүжилтийн хөтөлбөр” хэрэгжүүлэх шийдвэр гаргасантай холбогдуулан Монголбанкнаас мэдэгдэл гаргажээ. Энэ мэдэгдлийг Монголбанкны Хэвлэлийн төлөөлөгч Д.Оргил олон нийтэд танилцууллаа.
Мэдэгдэлд, “Өргөтгөсөн санхүүжилтийн хөтөлбөр”-ийн эхний ээлжийн 38.6 сая ам.долларын санхүүжилт Монгол Улсын валютын нөөцийг нэмэгдүүлэх зорилгоор Монголбанкинд орж ирээд байна. Монгол Улсад эдийн засгийн шинэчлэлийг хэрэгжүүлэх тус хөтөлбөрийн хүрээнд хийгдэх нийт 5.5 тэрбум ам.долларын хэмжээтэй санхүүжилтэд ОУВС, Дэлхийн банк, Азийн хөгжлийн банк, Жайка зэрэг олон улсын байгууллагуудаас гадна Япон, БНХАУ, БНСУ зэрэг 2 талт хамтын ажиллагааны орнууд оролцох болно. Хөтөлбөрийн үр дүнд Монгол Улсад үнийн тогтвортой байдал хангагдах, валютын нөөц нэмэгдэж 4 тэрбум ам.доллар орчимд хүрэх, төгрөгийн гадаад валюттай харьцах ханш тогтворжих, гадаад өрийн зохистой бүтэц, өрийн тогтвортой байдал хангагдах зэрэг эерэг өөрчлөлтүүд бий болохоор хүлээгдэж байна. Түүнчлэн, Монголбанкны засаглалыг сайжруулах, бие даасан байдлыг бэхжүүлэх, Монгол Улсад санхүүгийн тогтвортой байдлыг хангахaд чиглэсэн эрх зүйн шинэчлэл хийх болно. Банкны системийн эрүүл, найдвартай үйл ажиллагаа нь цаашид хувийн секторын дотоодын хөрөнгө оруулалтыг дэмжих, гадаадын хөрөнгө оруулалтыг татахад эерэг нөлөө үзүүлэх болно” гэжээ.
Үзсэн: 1251
Tweet