Биднийг дагаарай:
Хэл солих: Mongolian (Cyrillic)

Хэл солих:

Нэвтрүүлэг 2017-06-23,24
mongol

Шинэ мэдээ

БНСВУ-ын Дэд ерөнхийлөгч, хатагтай Данг Тхи Нгок Тхинь УИХ-ын дарга М.Энхболдтой уулзлаа


Densmaa 2017-05-09 12:05

УИХ-ын дарга М.Энхболд Монгол Улсын АПЕК-т элсэх, Зүүн Азийн дээд түвшний уулзалтад оролцох сонирхолд Вьетнам Улс дэмжлэг үзүүлнэ гэдэгт итгэлтэй байна гэлээ.

     Монгол Улсад албан ёсны айлчлал хийж буй БНСВУ-ын Дэд ерөнхийлөгч, хатагтай Данг Тхи Нгок Тхинь Монгол Улсын Их Хурлын дарга М.Энхболдтой уулзаж, хоёр орны харилцаа, хамтын ажиллагааны асуудлаар ярилцлаа.

УИХ-ын дарга М.Энхболд хоёр орны харилцаанд парламент хоорондын хамтын ажиллагаа чухал ач холбогдолтой болохыг онцлоод, парламент дахь найрамдлын бүлгүүд, Байнгын хороод болон Тамгын газар хоорондын харилцаа сүүлийн жилүүдэд өргөжиж байгаад сэтгэл ханамжтай байгаагаа илэрхийлж, энэ онд БНСВУ-ын Үндэсний ассамблейн Аюулгүй байдал, батлан хамгаалах байнгын хорооны дарга тэргүүтэй төлөөлөгчдийг айлчлуулахад бэлэн байна гэлээ. Мөн хоёр орны худалдаа, эдийн засгийн харилцааг өргөжүүлэх, хөрөнгө оруулалтыг нэмэгдүүлэх, томоохон төслүүд хэрэгжүүлэх, соёлын болон хэвлэл мэдээллийн төлөөлөгчдийг солилцох, хоёр орны түүх, соёлын онцлогийг харилцан сурталчлах, аялал жуулчлалыг хөгжүүлэх нь чухал хэмээлээ. УИХ-ын дарга М.Энхболд хоёр орон олон улсын байгууллагуудын хүрээнд идэвхтэй хамтран ажиллаж байгааг тэмдэглээд, Монгол Улсын АПЕК-т элсэх, Зүүн Азийн дээд түвшний уулзалтад оролцох сонирхолд Вьетнам Улс цаашид ч дэмжлэг үзүүлнэ гэдэгт итгэлтэй байна гэлээ.

БНСВУ-ын Дэд ерөнхийлөгч, хатагтай Данг Тхи Нгок Тхин “Миний айлчлалын бүрэлдэхүүнд Вьетнамын 20 гаруй томоохон бизнесмэн ирсэн. Тэд худалдаа, эдийн засаг, хөрөнгө оруулалтын хамтын ажиллагааны талаар монгол нөхөдтэйгээ амжилттай яриа хэлэлцээ өрнүүлнэ гэдэгт итгэлтэй байна” гээд хоёр улс бүс нутаг, олон улсын хамтын ажиллагааны механизмуудад харилцан бие биенийг дэмжихийн чухлыг онцлов.

Үзсэн: 95