"ITM Mongolia 2017" олон улсын аялал жуулчлалын үзэсгэлэн зохион байгуулагдана
Уг үзэсгэлэн нь аялал жуулчлалын бизнес эрхлэгчдэд бүтээгдэхүүнээ борлуулах, түншлэлийн гэрээ хэлэлцээр хийх, гадаад, дотоодын судлаачдын төрөлжсөн хэлэлцүүлэг, семинарт оролцох боломжийг олгоно.
БОАЖЯ, Монголын аялал жуулчлалын холбоо албан ёсны түнш Ховд аймагтай хамтран "Ай Ти Эм Монголиа”-2017 олон улсын аялал жуулчлалын үзэсгэлэнг энэ сарын 31-нээс ирэх сарын 1,2-ны өдрүүдэд Мишээл экспогийн үзэсгэлэнгийн танхимд зохион байгуулах гэж байна. 18 дахь жилдээ зохион байгуулагдаж байгаа тус үзэсгэлэн нь аялал жуулчлалын салбарын шинэ бүтээн байгуулалт, үйлчилгээг сурталчлан танилцуулах зорилготой. Түүнчлэн аялал жуулчлалын бизнес эрхлэгчдэд бүтээгдэхүүнээ борлуулах, түншлэлийн гэрээ хэлэлцээр хийх, гадаад, дотоодын судлаачдын төрөлжсөн хэлэлцүүлэг, семинарт оролцох боломжийг олгодог юм.
Энэ удаагийн үзэсгэлэнгийн аялал жуулчлалын чиглэлээр хамтран хэрэгжүүлэх төсөл хөтөлбөр, бүтээгдэхүүн солилцооны талаар хэлэлцүүлгийг зохион байгуулах юм. Мөн төрөл бүрийн бизнес уулзалт, гэрээ хэлэлцээрүүдийг баталгаажуулах “B to B” өдөрлөг болно. Үзэсгэлэнд тур оператор компаниуд, зочид буудал, жуулчны бааз, гэст хаус, их дээд сургуулиуд, төрийн болон төрийн бус байгууллагууд, төсөл хөтөлбөр, агаарын тээврийн үйлчилгээ эрхлэгч авиа компаниуд, урлаг соёлын байгууллага, аялал жуулчлалын дагалдах бүтээгдэхүүн үйлдвэрлэгчид зэрэг нийт 200 гаруй байгууллага, бизнес эрхлэгчид оролцож үйл ажиллагаагаа сурталчлах юм байна.
Үзсэн: 2079
Tweet