Монголын хэт холын гүйгчид эх орныхоо дөрвөн зүгийн хязгаарт хүрнэ
Гүйгчид өдөрт 50-55 км зам туулахаар бэлтгэлээ хангаж, ирэх долдугаар сард Үндэсний их баяр наадмын өмнө барианд орохоор зорьжээ
Монголын хэт холын гүйгчид эх орныхоо дөрвөн зүгийн хязгаарт орших Соёмбот баганыг төв цэгт холбосон 5000 км замыг туулахаар өнөөдөр Баян-Өлгий аймгаас гараагаа эхлүүллээ. Энэхүү гүйлтэд Зэвсэгт хүчний 123 дугаар ангийн хөгжимчин, цэрэгжлийн спортын мастер, ахлах ахлагч Э.Даваажамц, Зэвсэгт хүчний 234 дүгээр ангийн гүүрчин аврагч, спортын мастер, дэд ахлагч Б.Буянхишиг нар нэгдсэн байна. Тэд Алтай Таванбогдоос зүүн захын цэг Дорнод аймагт байрлах Соёлз уулын Модот хамар хүртэл 11 аймгийн 40 сумын нутаг дэвсгэрээр 3280 км замыг хоёр сарын дараа буюу 63 хоногт туулахаар төлөвлөжээ. Мөн хойд захын цэг Хөвсгөл аймагт байрлах Монгол шарын даваанаас өмнөд захын цэг Өмнөговь аймгийн Орвог гашууны Бор толгой хүртэл таван аймгийн 23 сумын нутаг дэвсгэрээр 1720 км замыг нэг сарын хугацаанд буюу 36 хоногт дуусгахаар тооцоолсон байна. Гүйгчид өдөрт 50-55 км зам туулахаар бэлтгэлээ хангаж, ирэх долдугаар сард Үндэсний их баяр наадмын өмнө барианд орохоор зорьжээ.
Үзсэн: 84
Tweet