БНЭУ-аас Монгол Улсад суугаа Онц бөгөөд Бүрэн эрхт Элчин сайд Атул Малхари Готсурве-гийн мэндчилгээ
2025 онд Монгол, Энэтхэг улсын хооронд дипломат харилцаа тогтоосны 70 жилийн ой тохионо.
Монгол-Энэтхэгийн харилцаа холбоо олон мянган жилийн өмнөх тэртээх үе рүү эргэн хөтөлнө. Тиймдээ ч манай хоёр орныг оюун санааны хөрш гэдэг. Монгол Энэтхэг 2 улсын орчин үеийн харилцааг 1955 онд дипломат харилцаа тогтоосноос хойш тооцдог. Социалист бус улс орнуудаас хамгийн анх Монгол Улсын тусгаар тогтнолыг хүлээн зөвшөөрсөн улс нь Энэтхэг улс юм. Түүнээс хойш хоёр улс олон улсын тавцанд нэг бус удаа бие, биенээ түшиж тулсан түүх бий. Монгол, Энэтхэг улсын хооронд дипломат харилцаа тогтоосны 70 жилийн ой ирэх онд тохионо. Ойг угтаж, хоёр улсын хооронд шууд нислэгтэй болох талаар санал солилцож, агаарын тээвэр, аялал жуулчлалын салбарын хөгжлийг эрчимжүүлэх тухай 2024 онд ярилцаж байлаа. Энэтхэг улсаас газрын тос, мэдээлэл технологи зэрэг салбарт ажиллах мэргэжилтэн олноор ирдэг бол Монголоос Энэтхэг улс руу эрүүл мэндийн үйлчилгээ авах, шашин соёлын үйл ажиллагаанд оролцох, аялах зорилгоор зорчдог юм.
Та бүхэнд БНЭУ-аас Монгол Улсад суугаа Онц бөгөөд Бүрэн эрхт Элчин сайд Атул Малхари Готсурве-гийн мэндчилгээ хүргэе.
Сайн байна уу?
Та бүхэнд шинэ 2025 оны халуун мэндийг дэвшүүлье.
Монголын Үндэсний Олон нийтийн Радио телевизийн нийт үзэгчид болон тэдний гэр бүлд шинэ оны мэнд дэвшүүлж, аз жаргал, амар амгалан, амжилт бүтээлээр дүүрэн байхыг хүсэн ерөөе.
Энэтхэг – Монгол улсууд стратегийн түнш, оюун санааны ахан дүүс билээ.
2025 онд бидний найрамдалт хэлхээ холбоо, олон талт харилцаа улам бүр батжин бэхэжнэ гэдэгт итгэлтэй байна.
2025 онд Энэтхэг болон Монгол Улсын хооронд дипломат харилцаа тогтоосны 70 жилийн ойг тэмдэглэн өнгөрүүлэх ба Энэтхэг Улсын Үндсэн хууль батлагдсаны 75 жилийн ой, мөн Бүгд найрамдах улсаа тунхагласны 75 жилийн ойг тэмдэглэн өнгөрүүлэх болно.
Та бүхэнд шинэ оны мэнд хүргэе.
Баярлалаа.
Үзсэн: 2909
Tweet