Хамгийн эртний зүймэл модон эмээлийн судалгааны дүн Antiquity Journal-д хэвлэгджээ
эмээлийг МЭ 420 оны орчмынх гэж үзэж байгаа аж
Монгол төдийгүй бүс нутгийн хэмжээнд олдоод буй хамгийн эртний зүймэл модон эмээлийн судалгааны дүн Antiquity Journal-д хэвлэгджээ. Ховд аймгийн Мянгад сумын нутаг Урд улаан үнээт уулын агуйн оршуулгаас 2014 онд Монголын Үндэсний музейн судлаачдын илрүүлсэн Жужан улсын үед холбогдох модон эмээл болон Дорнод аймгийн Гурванзагал ба Чойбалсан сумын заагт Хөх нуурын баруун хойд захад оршдог Өгөөмөр толгойн урд бэл дэх нэгэн булшнаас 2015 онд доктор Ц.Төрбат нарын илрүүлсэн өрөөсөн төмөр дөрөөний талаарх судлаачдын хамт шинжлэх ухааны янз бүрийн арга зүйгээр судалсан үр дүн ийнхүү хэвлэгдлээ. Хоёр талдаа арьсан оосортой хар, улаан өнгөөр будсан хус эмээл, төмөр хошуу, модон харвааны хэрэгсэл, муммижуулсан морины үлдэгдэл зэрэг хэд хэдэн эд өлгийн зүйл олж илрүүлсэн байна. Тэнд мөн хонь, доргоны арьсан хувцас өмсөж оршуулсан хүний араг яс байжээ. Уг булшийг "морьтны агуй" гэж нэрлэх болсон байна. Хүний шарилын цацраг туяа, эмээлийн арьсан дөрөөний оосор нь оршуулга болон эмээлийг МЭ 420 оны орчмынх гэж үзэж байгаа аж. Судалгааны ахлагч Колорадо Боулдерын их сургуулийн археологич Уильям Тейлор “Live Science”-д өгсөн ярилцлагадаа “Адууг гаршуулах нь хэцүү байсан. Урд улаан үнээтийн оршуулгын газраас олдсон адууны шүд нь бага зэрэг гэмтэлтэй, хамрын ясанд өөрчлөлт орсон байсан нь Төв болон Зүүн Азийн бусад адууны булшнаас олдсон гэмтэлтэй адил байсан. Урд улаан үнээтийн булшнаас олдсон адууны чих цоорхой байсныг харахад морийг хэнийх болохыг гэрчлэх зорилгоор ашигласан байж магадгүй юм" гэжээ.
Үзсэн: 789
Tweet