ХБНГУ-ын Бундестагийн гишүүн, Германы Социал демократ намын хамтарсан дарга Ларс Клингбайл

Densmaa 2023-06-12 12:06

Нийгэм

Ялангуяа залуучууд хоорондын харилцааг идэвхжүүлэх, парламентын ардчиллыг бэхжүүлэх, иргэд олон нийтийн саналыг авч шийдвэр гаргах үйл явцад тусгах зэрэг чиглэлд хамтран ажиллах боломжтой гэв

      УИХ-ын дарга Г.Занданшатар Холбооны Бүгд Найрамдах Герман Улсын Бундестагийн гишүүн, Германы Социал демократ намын хамтарсан дарга Ларс Клингбайл тэргүүтэй төлөөлөгчдийг хүлээн авч уулзав. Уулзалтын эхэнд УИХ-ын дарга Г.Занданшатар, Монгол Улсад 1990-ээд оны эхэн үеэс эхэлсэн улс төр, эдийн засаг, нийгмийн ардчилсан өөрчлөлт, шилжилтийн үйл явцыг Фрийдрих-Эбертийн сан эхнээс нь тууштай дэмжиж, иргэдийн улс төрийн оролцоог дээшлүүлж, иргэний нийгмийн байгууллагуудыг онцгойлон дэмжих, эмэгтэйчүүд-залуучуудын оролцоог дэмжих чиглэлээр амжилттай ажиллаж ирсэнд УИХ-ын дарга талархал илэрхийлэв. Холбооны Бүгд Найрамдах Герман Улсын Бундестагийн гишүүн, Германы Социал демократ намын хамтарсан дарга Ларс Клингбайл Монгол Улсын Их Хурлаас парламентын ардчиллыг бэхжүүлэхэд идэвх санаачилгатай ажиллаж байгааг тэмдэглээд энэ удаагийн айлчлал хоёр улсын харилцаа тэр дундаа парламент хоорондын хамтын ажиллагааг бэхжүүлэхэд түлхэц болно гэдэгт итгэлтэй байна гэв. Тэрбээр хоёр улсын харилцаа бүхий л салбарт хөгжиж байгаад сэтгэл хангалуун буйгаа илэрхийлээд цаашид эрчим хүч, аюулгүй байдал, шинжлэх ухаан, эдийн засгийн чиглэлээр харилцаа, хамтын ажиллагааг эрчимжүүлэх өргөн боломж бий. Ялангуяа залуучууд хоорондын харилцааг идэвхжүүлэх, парламентын ардчиллыг бэхжүүлэх, парламентын ид тод байдлыг хангах, иргэд олон нийтийн саналыг авч шийдвэр гаргах үйл явцад тусгах зэрэг чиглэлд хамтран ажиллах боломжтой гэдгийг хэлэв.